नापजाँच सम्पन्न भएको करिब नौ वर्षपछि धनुषाको बटेश्वर गाउँपालिकाका १८६ स्ववासी परिवारले जग्गाधनी प्रमाण पुर्जा (लालपुर्जा) प्राप्त गरेका छन्।
नापी कार्यालय धनुषाले आवश्यक कानुनी तथा प्रशासनिक प्रक्रिया पूरा गरी बटेश्वर गाउँपालिका-३ र ४ का १८६ परिवारलाई जग्गाधनी प्रमाण पुर्जा वितरण गरेको हो। यी क्षेत्र साबिक बटेश्वर गाउँ विकास समितिका वडा नम्बर १ देखि ९ सम्म पर्छन्।
लामो समयदेखि स्ववासीका रूपमा बसोबास गर्दै आएका स्थानीयले लालपुर्जा पाएसँगै आफूले भोगचलन गर्दै आएको जग्गामाथि औपचारिक कानुनी स्वामित्व प्राप्त गरेका छन्।
२०७४ मै सकिएको थियो नापजाँच
उक्त क्षेत्रको जग्गा नापजाँच तथा नाप नक्साको काम २०७४ सालमै सम्पन्न भएको थियो। तर नापजाँच सकिए पनि त्यसपछिका आवश्यक कानुनी तथा प्रशासनिक प्रक्रिया पूरा हुन नसक्दा जग्गाधनी प्रमाण पुर्जा वितरण रोकिएको थियो।
करिब नौ वर्षदेखि रोकिएको प्रक्रिया अघि बढाउँदै नापी कार्यालयले अहिले १८६ थान जग्गाधनी प्रमाण पुर्जा वितरण गरेको हो।
नापजाँच भएर पनि लामो समयसम्म लालपुर्जा नपाउँदा स्थानीयले भोगचलन गर्दै आएको जग्गाको कानुनी स्वामित्व स्थापित हुन सकेको थिएन।
कानुनी स्वामित्वसँगै आर्थिक कारोबारमा सहजता
जग्गाधनी प्रमाण पुर्जा प्राप्त गरेसँगै सम्बन्धित परिवारलाई जग्गाको कानुनी स्वामित्वका आधारमा विभिन्न आर्थिक तथा प्रशासनिक कारोबार गर्न सहज हुने भएको छ।
स्ववासी जग्गा दर्ता भई लालपुर्जा प्राप्त भएपछि जग्गालाई बैंक तथा वित्तीय संस्थामा धितो राखेर ऋण लिन सकिनेछ। त्यस्तै, स्वामित्व स्पष्ट हुँदा जग्गासँग सम्बन्धित विवाद समाधान तथा अन्य कानुनी कारोबारमा समेत सहजता आउनेछ।
यसअघि ४ हजार ५५४ परिवारलाई लालपुर्जा
धनुषामा स्ववासी जग्गाको नापजाँच तथा दर्ता प्रक्रिया पूरा गर्दै जग्गाधनी प्रमाण पुर्जा वितरणको काम अघि बढाइएको छ।
यसअघि जिल्लाका चार हजार ५५४ परिवारले लालपुर्जा प्राप्त गरिसकेका छन्। पछिल्लो पटक बटेश्वरका १८६ परिवारलाई प्रमाण पुर्जा वितरण गरिएसँगै लामो समयदेखि स्वामित्वको औपचारिक प्रमाणको प्रतीक्षामा रहेका थप परिवार लालपुर्जाको पहुँचमा आएका हुन्।
